የኢትዮጵያ የከተማነት ምጣኔ በ5.4% እያደገ መሆኑ ተገለጸ
የኢትዮጵያ የከተማነት (ከተሞችን የመቀላቀል) ምጣኔ በ5 ነጥብ 4 በመቶ እያደገ እንደሚገኝ የከተማና መሰረተ ልማት ሚኒስቴር አስታወቀ፡፡ ሚኒስቴሩ ይህን ያሳወቀው፣ የከተሞች እድገትና ልህቀት የአገርን አጠቃላይ ዕድገት ለመወሰን ቁልፍ እንደሆነ ባስረዳበት መድረክ ላይ መሆኑ ተጠቁሟል።
የከተማና መሰረተ ልማት ሚኒስትር ጫልቱ ሳኒ በሰጡት መግለጫ እንዳስረዱት፣ የአንድ ሀገር ዕድገትና ልህቀት የሚወሰነው በከተሞች ዕድገትና ጥራት መሆኑ የማይካድ ሀቅ ነው፡፡
ሚኒስትሯ ኢትዮጵያ በከተማነት ረጅም ታሪክ ቢኖራትም፣ የነበሯት ከተሞች ታሪኳን የሚመጥን ዕድገት ሳያሳዩ መቆየታቸውንና ሀገሪቱ በከተማነት ወደኋላ መቅረቷን ገልጸዋል፡፡
ይህንን ሁኔታ ለመቀየር፣ የለውጡ መንግስት ከተሞችን ከድህነት፣ ከመልካም አስተዳደር እጦትና ከሥራ አጥነት ማሳያነት አውጥቶ፣ የብልጽግና ማሳያ ለማድረግ አቅዶ እየሰራ መሆኑን አስታውቀዋል፡፡


