የዓለም የወርቅ ገበያ ከዚህ ቀደም ታይቶ የማይታወቅ የዋጋ ጭማሪ በማሳየት፣ አንድ ወርቅ ለመጀመሪያ ጊዜ በ4,400 ዶላር (3,275 የእንግሊዝ ፓውንድ) በላይ መሸጥ ጀምሯል።
የከበሩ ማዕድናት ዋጋ ለዚህ ታሪካዊ ጭማሪ የበቃው፣ የአሜሪካ ማዕከላዊ ባንክ በቀጣዩ ዓመት የወለድ ምጣኔን ይቀንሳል የሚል ሰፊ ግምት በመኖሩ እንደሆነ ተንታኞች አስታውቀዋል።
የወርቅ ዋጋ የ2025 የፈረንጆቹ ዓመትን ሲጀምር በግራም 2,600 ዶላር የነበረ ቢሆንም፣ በአሁኑ ወቅት የ68 በመቶ ጭማሪ አሳይቷል። ይህም ከ1979 ዓ.ም ወዲህ የታየ ከፍተኛው ዓመታዊ ዕድገት ሆኖ ተመዝግቧል።
የቡሊየን ቮልት (BullionVault) የምርምር ዳይሬክተር ኤድሪያን አሽ፣ ለዚህ “የወርቅ ዋጋ እብደት” ዋነኛ ተጠያቂው የፕሬዝዳንት ዶናልድ ትራምፕ አስተዳደር መሆኑን ይገልጻሉ።
እንደ አሽ ገለጻ፣ ትራምፕ በአሜሪካ ማዕከላዊ ባንክ ላይ የሚያደርጉት ተጽዕኖ፣ የንግድ ጦርነት ትንኮሳዎች እና የጂኦፖለቲካዊ ውጥረቶች ባለሀብቶች ሀብታቸውን እንደ ወርቅ ባሉ አስተማማኝ ንብረቶች ላይ እንዲያፈሱ አስገድዷቸዋል።
የሌሎች ማዕድናት እና የነዳጅ ሁኔታ
የሰኞው የገበያ መረጃ እንደሚያሳየው፣ ከወርቅ በተጨማሪ የብር ዋጋም ከፍተኛ ጭማሪ አሳይቶ በአውንስ 69.44 ዶላር ደርሷል።
ብር በዘንድሮው ዓመት ብቻ የ138 በመቶ ጭማሪ በማሳየት ከወርቅ በበለጠ ከፍተኛ ትርፍ ያስገኘ ማዕድን ሆኗል። ፕላቲኒየምም ቢሆን ላለፉት 17 ዓመታት ታይቶ የማይታወቅ ከፍተኛ ዋጋ ላይ ይገኛል።
በሌላ በኩል፣ አሜሪካ በቬንዙዌላ የነዳጅ ጫኝ መርከቦች ላይ “የማገጃ” ትዕዛዝ ማስተላለፏን ተከትሎ የነዳጅ ዋጋ ጭማሪ አሳይቷል። የብሬንት ድፍድፍ ነዳጅ ዋጋ በ1.31 ዶላር ጭማሪ በማሳየት በበርሜል 61.78 ዶላር ደርሷል።
የ Goldman Sachs ትንታኔ እንደሚያመለክተው፣ በዓለም ዙሪያ ያሉ ማዕከላዊ ባንኮች በዶላር ላይ ያላቸውን ጥገኝነት ለመቀነስና የኢኮኖሚ አለመረጋጋትን ለመቋቋም የወርቅ ክምችታቸውን እያሳደጉ ነው። ይህ አዝማሚያ እስከ 2026 ዓመት ድረስ ተጠናክሮ እንደሚቀጥልና የወርቅ ዋጋም በተመሳሳይ ሁኔታ እየናረ ሊሄድ እንደሚችል ተገምቷል።@seco


