በኤልኒኖ የአየር ንብረት መዛባት ምክንያት በሚከሰት የዝናብ እጥረት እና በዓለም አቀፍ የነዳጅ ዋጋ መናር ሳቢያ፣ በመጪው የፈረንጆች ዓመት (2027) ተጨማሪ 2.8 ሚሊዮን ኢትዮጵያውያን ለምግብ እጥረት ሊጋለጡ እንደሚችሉ ዓለም አቀፉ የምግብ ፖሊሲ ምርምር ኢንስቲትዩት አስጠነቀቀ።
አዲሱ የኢንስቲትዩቱ ጥናት እንደሚያመለክተው፣ የአየር ንብረት መዛባቱ በግብርና ምርታማነት ላይ በሚፈጥረው መስተጓጎል ምክንያት 905 ሺህ ተጨማሪ ዜጎች ወደ ድህነት ሊገቡ ይችላሉ።
የኢትዮጵያ አጠቃላይ የሀገር ውስጥ ምርት ዕድገትም ከተተነበየው ከ0.4 እስከ 1.1 በመቶ ሊቀንስ እንደሚችል ተገምቷል።
በዋናው የክረምት ወቅት በተለይም በሰሜንና በምስራቅ የሀገሪቱ ክፍሎች በተከሰተው የዝናብ እጥረት፣ በደረቅ ደጋማ አካባቢዎች የግብርና ምርት በ9.6 በመቶ፣ በቆላማ አካባቢዎች ደግሞ በ6.5 በመቶ እንደሚቀንስ ጥናቱ አመላክቷል።
ይህ ሁኔታ የቤተሰቦችን የመግዛት አቅም በአማካይ በ1.9 በመቶ የሚያዳክም ሲሆን፣ ለምግብ እጥረት ከሚጋለጡት ዜጎች ውስጥ 76 በመቶው የገጠር ነዋሪዎች ይሆናሉ ተብሏል። ስለሆነም የሰብዓዊ ዕርዳታ ፍላጎት ከሰኔ እስከ ነሐሴ 2019 ዓ.ም ባለው ጊዜ ውስጥ ከፍተኛ ደረጃ ላይ ከመድረሱ በፊት፣ መንግስትና ዓለም አቀፍ ረጂ ድርጅቶች ቀድመው አስፈላጊውን ዝግጅት እንዲያደርጉ ተመራማሪዎቹ አሳስበዋል።SECO


