የአሜሪካው ፕሬዝዳንት ዶናልድ ትራምፕ እና የህንዱ ጠቅላይ ሚኒስትር ናሬንድራ ሞዲ በሁለቱ ሀገራት መካከል የነበረውን የንግድ ውጥረት የሚፈታና አዲስ የኢኮኖሚ ትብብር የሚፈጥር ታሪካዊ ስምምነት ላይ መድረሳቸውን አስታውቀዋል።
በዚህ ስምምነት መሰረት፣ አሜሪካ በህንድ ምርቶች ላይ ጥላው የነበረውን የ50 በመቶ ታሪፍ ወደ 18 በመቶ ዝቅ ያደረገች ሲሆን፣ ይህም ህንድ ከሩሲያ ዘይት በመግዛቷ ምክንያት ተጥሎባት የነበረውን የ25 በመቶ ቅጣት የሚያነሳ ነው።
በምላሹም ህንድ ከሩሲያ ነዳጅ መግዛቷን በማቆም በአሜሪካ እና በቬንዙዌላ ምርቶች ለመተካት ከመስማማቷም በላይ፣ ከ500 ቢሊዮን ዶላር በላይ ዋጋ ያላቸውን የአሜሪካ የኢነርጂ፣ የቴክኖሎጂ እና የግብርና ምርቶች ለመግዛት ቃል ገብታለች።
ፕሬዝዳንት ትራምፕ ይህ ስምምነት ለሁለቱ ሀገራት ታላቅ ድል መሆኑን ገልጸው፣ የሩሲያ-ዩክሬን ጦርነትን ለማቆም በሚደረገው ጥረት ላይም አዎንታዊ ተጽዕኖ እንደሚኖረው ገልጸዋል።
ጠቅላይ ሚኒስትር ናሬንድራ ሞዲ በበኩላቸው፣ ስምምነቱ ለ1.4 ቢሊዮን የህንድ ህዝብ ትልቅ እድል የሚፈጥርና “በህንድ የተሰሩ” ምርቶች ወደ አሜሪካ ገበያ በቀላሉ እንዲገቡ የሚያስችል መሆኑን በመጥቀስ ደስታቸውን ገልጸዋል።
ይህ በአሜሪካ እና በህንድ መካከል የተደረገው ስምምነት ህንድ ከአውሮፓ ህብረት ጋር የነፃ ንግድ ስምምነት ባደረገች በሳምንት ጊዜ ውስጥ የተፈጸመ ሲሆን፣ በዓለም አቀፍ የንግድ ገበያና በአሜሪካ አክሲዮን ገበያ ላይ መነቃቃትን ፈጥሯል።@SECO


