የታንዛኒያ ባንዲራ የምታውለበልብ መርከብ በባህር ዘራፊዎች መያዙ ተሰማ
የታንዛኒያ ሰንደቅ ዓላማ የምታውለበልበው “ኤምቲ አሳና” የተሰኘች የካርጎ መርከብ፣ በየመን የባህር ዳርቻ አቅራቢያ በባህር ዘራፊዎች ቁጥጥር ስር መዋሏ ተዘገበ። መርከቧ ከፓኪስታን ካራቺ ወደ ሶማሊያ ቦሳሶ በመጓዝ ላይ ሳለች ነበር ጥቃቱ የተፈጸመባት።
የባህር ደህንነት ተቋማት የሆኑት ዩኬኤምቲኦ እና አምብሬት እንደገለጹት፣ መርከቧ ከመጠለፏ ጥቂት ቀደም ብሎ የድረሱልኝ ጥሪ አስተላልፋለች። ይህ ክስተት ከ2023 መጨረሻ ወዲህ ዳግም እያገረሸ ባለው የባህር ላይ ዘረፋ ቀጣይ መሆኑ ተጠቁሟል። ሁኔታው በአደን ባህረ ሰላጤ እና በምዕራብ ህንድ ውቅያኖስ የንግድ መርከቦች እንቅስቃሴ ላይ ከፍተኛ ስጋት የፈጠረ ሲሆን፣ የደህንነት አካላትም አስፈላጊውን ክትትል እያደረጉ ይገኛሉ።


