በአለምሰገድ እስጢፋኖስ
በፌስቲቫ ከ10 ሺህ ሰዎች በላይ እንደሚታደሙ ተጠቁሟል፡፡
የሥነ-ፈጠራ ጥበባት ለለውጥ በሚል መሪ ቃል በአዲስ አበባ ቱሪዝም ኮሚሽን ፣ በዘሌማን ኮሚኒኬሽን እና በፍሎውለስ ኤቨንትስ ትብብር የሚዘጋጀው ፌስቲቫል የአፍሪካን የሥነ-ፈጠራ ኢንዱስትሪ ወደ ተጨባጭ የኢኮኖሚ አቅም መቀየርን ቀዳሚ ዓላማው እንደሆነ ተነገሯል፡፡
ክራፍት አዲስ ሥነ-ፈጠራ ከካፒታል ጋር የሚገናኝበት ልዩ ፓን-አፍሪካዊ መድረክ እንደሆነም ተጠቁሟል።
ፌስቲቫሉ ሥራ ፈጣሪዎች፣ ባለሀብቶች ፣ የኢንዱስትሪ መሪዎች እና ባለድርሻ አካላትን በማገናኘት የአፍሪካ የሥነ-ፈጠራ ኢንዱስትሪ ያለውን ሙሉ የኢኮኖሚ አቅም ለመጠቀም ያስችላል ተብሏል።

ከመደበኛ የተሰጥኦ ትርኢቶች እና የፌስቲቫል ክንውኖች ባሻገር በሥራዎች ዕድገት፣ በገበያ ተደራሽነት እና በዓለም አቀፍ ተወዳዳሪነት ላይ ትኩረት እንደሚደረግ ተገልጿል።
መድረኩ የአፍሪካ የሥነ-ፈጠራ ውጤቶች በዓለም አቀፍ ደረጃ ዕውቅና እንዲኖራቸው እና ስራቸውን በስፋት ለማሰራጨት እንዲሁም ለማሳደግ የሚያስችላቸውን እድል እንደሚፈጥር ነው አዘጋጆቹ የተናገሩት፡፡
የሥነ-ፈጠራ ዘርፍ ለሀገር ውስጥ ጠቅላላ ምርት (GDP) ትልቅ አስተዋጽኦ ካላቸው እና ለወጣቶች ሰፊ የሥራ ዕድል ከሚፈጥሩ ዘርፎች መካከል አንዱ ሲሆን ለአህጉሪቱ ሁሉን አቀፍ የኢኮኖሚ ዕድገት ወሳኝ መሪ ኃይል ነው ተብሏል፡፡
ፌስቲቫሉ ከሚያዝያ 22 እስከ 24 ቀን 2018 ዓ.ም. በአድዋ ድል መታሰቢያ የሚካሄድ ሲሆን ከ10 ሺህ በላይ ተሳታፊዎች እንደሚታደሙና በኢንቨስትመንትና በሥነ-ፈጠራ ኢኮኖሚ ዙሪያ የተለያዩ የፓናል ውይይቶች እንደሚካሄድ እና በዓለም አቀፍ ደረጃ ከፍተኛ ተፅዕኖ ፈጣሪና የኢትዮ-ጃዝ ሙዚቃ አባት በሆነው ሙላቱ አስታጥቄ ‘የክብር ኮንሰርት’ እንደሚቀርብ አዘጋጆቹ ጨምረው ገልጸዋል።@SECO


