የፋይናንስ ተቋማት ፌዴሬሽን በባንክ ሠራተኞች ብድር ላይ የተጣለውን የ35 በመቶ ታክስ እንዲሰረዝ ጠየቀ

በኢቢቪ ዘጋቢ

የኢትዮጵያ የፋይናንስ ተቋማት ኢንዱስትሪ ፌዴሬሽን፣ በቅርቡ በሚኒስትሮች ምክር ቤት በጸደቀው የፌዴራል የገቢ ግብር መመሪያ ማሻሻያ ላይ ያለውን ከፍተኛ ተቃውሞ ገለጸ።

ፌዴሬሽኑ በተለይም በባንክ ሠራተኞች የቤትና የተሽከርካሪ ብድር ወለድ ልዩነት ላይ የተጣለው የ35 በመቶ የገቢ ግብር ፍትሐዊ ስላልሆነ በአስቸኳይ እንዲሰረዝ ለጠቅላይ ሚኒስትር ጽሕፈት ቤት አቤቱታ አቅርቧል።

ውዝግቡ የተቀሰቀሰው አዲሱ መመሪያ፣ ባንኮች ለሠራተኞቻቸው የሚሰጡትን ዝቅተኛ ወለድ (7 በመቶ) እና በብሔራዊ ባንክ የተቀመጠውን መደበኛ የማበደሪያ ወለድ (15 በመቶ) መካከል ያለውን የ8 በመቶ ልዩነት እንደ “ተጨማሪ ገቢ” በመቁጠር ግብር እንዲከፈልበት በመወሰኑ ነው።

ፌዴሬሽኑ ለጠቅላይ ሚኒስትሩ፣ ለብሔራዊ ባንክ እና ለገንዘብ ሚኒስቴር በላከው ደብዳቤ፣ ይህ አሠራር ሠራተኛው እጁ ላይ የሚደርሰውን ገቢ እጅግ አነስተኛ እንደሚያደርገው አስረድቷል።

የፌዴሬሽኑ ፕሬዝዳንት አቶ ደስታ በርሄ እንደገለጹት፣ የፋይናንስ ዘርፍ ሠራተኞች ቀድሞውኑ 35 በመቶ የገቢ ግብር፣ 7 በመቶ የጡረታ መዋጮ እና የብድር ዕዳ ክፍያ የሚፈጽሙ በመሆኑ፣ አዲሱ ታክስ ሲታከልበት አንድ ሠራተኛ ከጠቅላላ ደመወዙ የሚያገኘው 14.67 በመቶ ብቻ ነው።

ይህ ሁኔታ ሠራተኞች አሁን ያለውን የኑሮ ውድነት ለመቋቋም በሚያደርጉት ጥረት ላይ ትልቅ እንቅፋት መሆኑንና ምርታማነትን እንደሚቀንስ ፕሬዝዳንቱ አክለው ገልጸዋል።

በተጨማሪም ፌዴሬሽኑ እንደ ኢትዮጵያ አየር መንገድ እና ኢትዮ ቴሌኮም ያሉ ታላላቅ የመንግሥት የልማት ድርጅቶች ሠራተኞች ተመሳሳይ ጥቅማ ጥቅሞችን ያለ ታክስ እያገኙ መሆኑን በመጥቀስ፣ በፋይናንስ ዘርፉ ላይ ብቻ እንዲህ ዓይነት ጫና መፈጠሩ አድልዎ ያለበት አሠራር ነው ሲል ወቅሷል።

በመሆኑም መንግሥት የሠራተኛውን መሰረታዊ ፍላጎት ግምት ውስጥ በማስገባት የታክስ መመሪያውን እንዲያሻሽል ወይም ሙሉ በሙሉ እንዲሰርዝ ጥሪ አቅርቧል።@SECO

Related

አምባሳደር ብርሃኑ ፀጋዬ እና ከፍተኛ የመንግስት የስራ  ሀላፊዎች ከኢትዮጵያ ባህር ትራንስፖርትና ሎጂስቲክስ አገልግሎት ድርጅት ሀላፊነታቸው ተነሱ

ድርጅቱን በቦርድ ሊቀመንበርነት ሲመሩት የነበሩት አምባሳደር ብርሃኑ ፀጋዬ፣ምክትል  ሰብሳቢ...

በኢትዮጵያ ኢንቨስትመንት ሆልዲንግስ የተሰጠው የእገዳ መመሪያ ውዝግብ አስነሳ​​

በኢትዮጵያ የሰራተኞች ማህበራት ኮንፌዴሬሽን (ኢሰማኮ) እና በኢትዮጵያ ኢንቨስትመንት ሆልዲንግስ...

የኢትዮጵያ ንግድ ባንክ ሠራተኞች የሦስት እርከን የደመወዝ ጭማሪ በኢትዮጵያ ኢንቨስትመንት ሆልዲንግስ ጸደቀ

የሀገሪቱ ግዙፉ መንግሥታዊ የፋይናንስ ተቋም የሆነው የኢትዮጵያ ንግድ ባንክ...

አዳማ  የፈጣን ስማርት የኤሌክትሪክ መኪና ባትሪ መሙያ  ተጠቃሚ  ሆነች

በአለምሰገድ እስጢፋኖስ ኢትዮ ቴሌኮም በዛሬው ዕለት ለመጀመሪያ ጊዜ ከአዲስ አበባ...

የኢትዮጵያ የሚዲያ ልህቀት ማዕከል ተመረቀ

“ከማገዳችን በፊት ከአምስቴ በላይ ማስጠንቀቂያ ሰጥተናል!” የመገናኛ ብዙኃን ባለስልጣን ያስመረቀው...

Popular Categories