የአውሮፓ ህብረት በዩክሬን ላይ እየተካሄደ ያለውን ጦርነት ተከትሎ በሩሲያ ላይ የሚጥለውን 21ኛውን ከባድ የኢኮኖሚ ማዕቀብ ረቂቅ ይፋ ማድረጉን የህብረቱ ከፍተኛ ዲፕሎማት ካጃ ካላስ አስታወቁ።
ይህ አዲስ እቅድ በተለይ የሀገሪቱን የፋይናንስ ዘርፍ፣ የክሪፕቶ ፕላትፎርሞችን እና የሰው አልባ አውሮፕላን (ድሮን) ማምረቻዎችን በከፍተኛ ደረጃ የሚያናጋ ነው።
በዚህ ረቂቅ መሰረት 170 ግለሰቦችና ተቋማት ላይ ማዕቀብ የሚጣል ሲሆን፣ ከእነዚህም መካከል 90 የሚጠጉት የሩሲያ ባንኮች ናቸው። ይህም ህብረቱ በአንድ ጊዜ ከፍተኛ ቁጥር ባላቸው ባንኮች ላይ ማዕቀብ የጣለበት የመጀመሪያው አጋጣሚ ሲሆን፣ በማዕቀብ የተመቱትን የሩሲያ ባንኮች አጠቃላይ ቁጥር ከ100 በላይ ወይም በዓለም አቀፍ ደረጃ ግንኙነት ካላቸው የሀገሪቱ አበዳሪ ተቋማት መካከል ግማሽ ያህሉን ያጠቃልላል።
ማዕቀቡ የሀብት እገዳ፣ የጉዞ እና የገንዘብ ዝውውር እገዳዎችን የሚያካትት ሲሆን፣ ውሳኔው እንዲጸድቅ የሁሉም የህብረቱ አባል ሀገራት ስምምነት ያስፈልገዋል።
የአውሮፓ ህብረት ዲፕሎማሲያዊ ምንጮች እንደገለጹት፣ የማዕቀቡ ዋና ዓላማ የሩሲያን የፋይናንስ ስርዓት በማዳከም ሞስኮ ከዩክሬን ጋር የሰላም ድርድር እንድታደርግ ግፊት ለመፍጠር ነው።
ባለፈው ዓመት የሩሲያ የኢኮኖሚ እድገት በከፍተኛ ወለድ እና በምዕራባውያን ማዕቀቦች ሳቢያ ወደ 1 በመቶ ዝቅ ማለቱ የሚታወስ ሲሆን፣ የሀገሪቱ የኢኮኖሚ ጥናት ተቋማትም የባንክ ቀውስ ሊከሰት እንደሚችል በስጋት እያስጠነቀቁ ይገኛሉ።
ከባንኮች በተጨማሪ ማዕቀቡ ሩሲያ ገደቦችን ለማለፍ የምትጠቀምባቸውን 11 የክሪፕቶፕሌቶፎርሞችን የሚያካትት ሲሆን፣ የአውሮፓ ኮሚሽን ፕሬዝዳንት ኡርሱላ ፎን ደር ሌየን እንደገለጹት፣ ይህ ውሳኔ ወደፊት በሶስተኛ ወገን ሀገራት ላይ ጭምር ሙሉ የክሪፕቶ አገልግሎት እገዳ ለመጣል መሰረት የሚጥል ነው።
በተጨማሪም በአሁኑ ወቅት በርሜሉ ከ90 ዶላር በላይ እየተሸጠ ከሚገኘው የብሬንት ነዳጅ አንጻር፣ ህብረቱ የሩሲያ ድፍድፍ ነዳጅ የመሸጫ ዋጋ ጣሪያ አሁን ባለው 44 ዶላር ከ10 ሳንቲም ላይ ለስድስት ወራት እንዲቀዘቅዝ አቅዷል። ማዕቀቡ የሩሲያን የነዳጅ ማመላለሻ መርከቦች፣ የፈሳሽ ተፈጥሮ ጋዝ ሽያጭን፣ የዓሣ ምርት እና ለውትድርና አገልግሎት የሚውሉ የብረታ ብረት ውህዶችን የወጪና ገቢ ንግድ የሚገድቡ አዳዲስ ህጎችንም አካቷል።@seco


