በመካከለኛው ምስራቅ እየተካሄደ ባለው የድሮን እና የሚሳኤል ጥቃት ምክንያት በሆርሙዝ የባህር ሰርጥ ላይ የተደቀነውን የንግድ መቆም ለመፍታት፣ የትራምፕ አስተዳደር የ20 ቢሊዮን ዶላር የባህር ላይ የመድን ዋስትና ይፋ አድርጓል።
ይህ እርምጃ የተወሰደው የዓለም አቀፍ መድን ሰጪ ድርጅቶች በግጭቱ ስጋት ምክንያት ለአካባቢው የሚሰጡትን ሽፋን በማቋረጣቸውና የመርከቦች እንቅስቃሴ በ90% በመቀነሱ ነው።
አዲሱ ዕቅድ በመንግስት ደረጃ የሚደገፍ ሲሆን፣ በክልሉ ለሚንቀሳቀሱ የንግድ መርከቦች፣ ለጭነቶች እና ለማሽነሪዎች የጦርነት ስጋት ሽፋን በመስጠት የነዳጅ፣ የተፈጥሮ ጋዝ እና የማዳበሪያ ምርቶች በድጋሚ ለዓለም ገበያ እንዲቀርቡ ለማድረግ ያለመ ነው።
የወታደራዊ ጥበቃ እና የመርከቦች ስጋት
ይህ የኢንሹራንስ ድጋፍ ከአሜሪካ ማዕከላዊ ዕዝ ጋር በመቀናጀት የሚተገበር ሲሆን፣ ፕሬዝዳንት ትራምፕ አስፈላጊ ሆኖ ከተገኘ የአሜሪካ ባህር ኃይል የነዳጅ ጫኝ መርከቦችን ታጅቦ እንዲያሳልፍ ትዕዛዝ ሊሰጡ እንደሚችሉ ፍንጭ ሰጥተዋል።
በአሁኑ ወቅት በአካባቢው የሚገኘው የደህንነት ስጋት “አሳሳቢ” (Critical) በሚባል ደረጃ ላይ የሚገኝ ሲሆን፣ ወደ 1,000 የሚጠጉ መርከቦች በፋርስ ባህረ ሰላጤ ውስጥ ተጠልለው ወይም ቆመው የደህንነት ዋስትና እየጠበቁ ይገኛሉ።
የዚህ የ20 ቢሊዮን ዶላር ፈንድ መቋቋም፣ የግል ኢንሹራንስ ኩባንያዎች የፈጠሩትን ክፍተት በመሙላት መርከቦች ወደ ስራ እንዲመለሱ ከፍተኛ ሚና ይኖረዋል ተብሎ ይጠበቃል።
የቀጠለው ጥቃት እና የሩሲያ ጣልቃ ገብነት
በሌላ በኩል፣ በሆርሙዝ የባህር መስመር አቅራቢያ በደረሰ ጥቃት የአራት መርከበኞች ህይወት ማለፉ የተሰማ ሲሆን፣ የዓለም አቀፍ የባህር ትራንስፖርት ድርጅት በሲቪል መርከበኞች ላይ እየደረሰ ያለው አደጋ እጅግ አሳሳቢ መሆኑን አስታውቋል።
ከዚህ ጋር ተያይዞ የወጡ የደህንነት መረጃዎች እንደሚያመለክቱት፣ ሩሲያ ለአሜሪካ የጦር መርከቦች ኢላማ የሚሆኑ መረጃዎችን ለኢራን እየሰጠች መሆኑ ተገልጿል።@SECO


