የሀገር ባህል ልብስ ዘርፍ በጥብቅ የግብር አፈፃፀም ምክንያት የህልውና አደጋ ተጋርጦበታል

በኢቢቪ ዘጋቢ

የኢትዮጵያ ባህላዊ አልባሳት ዘርፍ የሀገሪቱ የባህል መገለጫ እና ለሺዎች የሚቆጠሩ ጥቃቅን ባለሙያዎች የገቢ ምንጭ ቢሆንም፣ በአሁኑ ወቅት ከባድ የህልውና ስጋት ደቅኖበታል። በታሪካዊው መርካቶ ሸማ ተራ የሚገኙ ነጋዴዎች—የሀገሪቱ የባህላዊ አልባሳት ንግድ ማዕከል—መንግስት ተግባራዊ እያደረገ ባለው የተጨማሪ እሴት ታክስ (VAT) ምዝገባ ሳቢያ ከፍተኛ ቅሬታ እያሰሙ ይገኛሉ።

በመርካቶ ሸማ ተራ የሚገኙ እነዚሁ ነጋዴዎች እንደተናገሩት ከቅርብ ጊዜ ወዲህ በመንግስት በኩል የሚደረገው የተጨማሪ እሴት ታክስ (VAT) ምዝገባ እንዲሁም ተያያዥ የሆኑ ከባድ ቅጣቶች ናቸው።

በተለይም በመጋቢት ወር ላይ “መዝገብ አልያዛችሁም” በሚል የተላኩ ደብዳቤዎች እና የተጣሉ የገንዘብ ቅጣቶች ከነጋዴዎቹ አቅም በላይ መሆናቸው እየተገለጸ ነው።

የሀገር ባህል ልብስ ስራ የሚጀምረው በተበታተኑ አካባቢዎች በሚገኙ የባህል ሰሪ ባለሙያዎች ማለትም በሸማኔዎች፣ በጠላፊዎች፣ በሰፊዎች እና በቋጮች እንደሆነ ይነገራል።

“የእኛ የዕሴት ሰንሰለት ደረሰኝ የማይገኝበት ነው” ይላሉ አንዱ የሸማ ተራ ነጋዴ ሲናገሩ። “ሸማውን የሚሸምኑት፣ ጥልፍ የሚጠልፉት እና ልብሱን አጠናቀው የሚያቀርቡልን ግለሰቦች አነስተኛ የባህል ባለሙያዎች ናቸው። እነዚህ ሰዎች ድርጅት የላቸውም፣ ደረሰኝም አይሰጡም። እንዲያውም ‘ፈርሙልን’ ብንላቸው እንኳን ለመፈረም ፈቃደኛ አይደሉም።”

በቅርቡ በገቢ ግብር ረቂቅ ደንብ ላይ በተለያዩ ዘርፎች ከተሰማሩ የንግዱ ማህበረሰብ ክፍሎች፣ የታክስ ባለሙያዎች፣ የሕግ አማካሪዎች ከገንዘብ ሚኒስትር አመራሮች ጋር በተደረገው ዉይይት ላይ ከዘርፉ ተዋንያን በርካታ ጥያቄዎች ተነስተዋል።

አሁን ባለው ደንብ ነጋዴዎች ወደ ቫት (VAT) እንዲገቡ ሲገደዱ፣ ለገዙት እቃ ሁሉ ደረሰኝ ማቅረብ ይጠበቅባቸዋል። ነገር ግን ከሸማኔው ደረሰኝ ማግኘት በማይችሉበት ሁኔታ የ15 በመቶውን ታክስ ሙሉ በሙሉ ነጋዴው ራሱ እንዲሸከም ወይም ኑሮ በውድነቱ በከበደው ደንበኛ ላይ እንዲጨምር እያደረገው ነው።

የሁለት ሚሊዮን ብር ገደብ እና ወቅታዊ ስራ

የገቢዎች ሚኒስቴር ነጋዴዎቹን ወደ ቫት ምዝገባ ያስገባቸው አመታዊ ሽያጫቸው ሁለት ሚሊዮን ብር ይሞላል በሚል ግምት ነው። ነጋዴዎቹ ግን ይህ ቁጥር ከመሬት ካለው እውነታ የራቀ ነው በማለት አስረድተዋል።

“አመታዊ ሽያጫችሁ ሁለት ሚሊዮን ይሞላል የተባልነው በምን አግባብ እንደሆነ ግልጽ አይደለም” ሲሉ ሌላ ነጋዴ ጥያቄያቸውን ያነሳሉ። “የሀገር ባህል ልብስ እንደ ዳቦ ወይም ዘይት የሁልጊዜ ገበያ የለውም። ስራው ወቅታዊ ነው። በአመት ውስጥ ቢበዛ ለሁለት ወቅቶች (ለበዓላት) ብቻ ነው ገበያ የሚኖረው። በቀሪው ወራት ግን 90 በመቶ የሚሆነው እቃችን መጋዘን ውስጥ ተከማችቶ ነው የሚቀመጠው።”

ይህ ሂደት በከባድ ቅጣቶች የታጀበ መሆኑ ነገሩን ይበልጥ አባብሶታል። አንዳንዶች እስከ 150 ሺህ ብር ቅጣት እንደተጣለባቸውና በኋላም በተለያየ መድረክ በመማጸን ወደ 50 በመቶ ዝቅ እንዲልላቸው ማድረጋቸውን ይናገራሉ። ሆኖም የችግሩ ዋና መንስኤ የሆነው “ደረሰኝ አልባው ሰንሰለት” መፍትሄ አላገኘም።

እነዚህ ነጋዴዎች እንደተናገሩት፤ በመርካቶ ጥብቅ ቁጥጥር ባለበት ስፍራ ሆነው ግብር የሚከፍሉ ነጋዴዎች፣ በቲክቶክ (TikTok) እና በቴሌግራም ምንም አይነት ግብር ሳይከፍሉ ከሚነግዱ የመስመር ላይ (Online) ነጋዴዎች ጋር መወዳደር ከብዷቸዋል።

“እኛ መርካቶ ውስጥ ግብር እየተጠየቅን ስንሰቃይ፣ ገበያው ወደ ኦንላይን እየሄደ ነው” ይላሉ ነጋዴዎቹ። “ይህ ተመጣጣኝ ያልሆነ የገበያ ውድድር እያጠፋን ነው።”

የንግድ ማህበረሰቡ የገንዘብ ሚኒስቴር እና የገቢዎች ሚኒስቴር ይህንን ዘርፍ በልዩ ሁኔታ እንዲያጠኑት ጥሪ እያቀረቡ ነው። የባህል ባለሙያዎችንና በርካታ ቤተሰብ የሚያስተዳድሩ ዜጎችን የያዘው ይህ ዘርፍ፣ ወደ መደበኛ የግብር ስርዓት ከመግባቱ በፊት የባለሙያዎቹን ነባራዊ ሁኔታ ግምት ውስጥ ያስገባ አሰራር እንዲዘረጋ ጠይቀዋል።@SECO

Related

አምባሳደር ብርሃኑ ፀጋዬ እና ከፍተኛ የመንግስት የስራ  ሀላፊዎች ከኢትዮጵያ ባህር ትራንስፖርትና ሎጂስቲክስ አገልግሎት ድርጅት ሀላፊነታቸው ተነሱ

ድርጅቱን በቦርድ ሊቀመንበርነት ሲመሩት የነበሩት አምባሳደር ብርሃኑ ፀጋዬ፣ምክትል  ሰብሳቢ...

በኢትዮጵያ ኢንቨስትመንት ሆልዲንግስ የተሰጠው የእገዳ መመሪያ ውዝግብ አስነሳ​​

በኢትዮጵያ የሰራተኞች ማህበራት ኮንፌዴሬሽን (ኢሰማኮ) እና በኢትዮጵያ ኢንቨስትመንት ሆልዲንግስ...

የኢትዮጵያ ንግድ ባንክ ሠራተኞች የሦስት እርከን የደመወዝ ጭማሪ በኢትዮጵያ ኢንቨስትመንት ሆልዲንግስ ጸደቀ

የሀገሪቱ ግዙፉ መንግሥታዊ የፋይናንስ ተቋም የሆነው የኢትዮጵያ ንግድ ባንክ...

አዳማ  የፈጣን ስማርት የኤሌክትሪክ መኪና ባትሪ መሙያ  ተጠቃሚ  ሆነች

በአለምሰገድ እስጢፋኖስ ኢትዮ ቴሌኮም በዛሬው ዕለት ለመጀመሪያ ጊዜ ከአዲስ አበባ...

የኢትዮጵያ የሚዲያ ልህቀት ማዕከል ተመረቀ

“ከማገዳችን በፊት ከአምስቴ በላይ ማስጠንቀቂያ ሰጥተናል!” የመገናኛ ብዙኃን ባለስልጣን ያስመረቀው...

Popular Categories