በዳንጎቴ ሪፋይነሪ እና በነዳጅ አከፋፋዮች መካከል የነበረው ግዙፍ የነዳጅ ግዢ ስምምነት ፈረሰ

በናይጄሪያው ቢሊየነር አሊኮ ዳንጎቴ ባለቤትነት በሚተዳደረው የነዳጅ ማጣሪያ ጣቢያ እና በ20 ዋና ዋና የነዳጅ አከፋፋዮች መካከል በየወሩ 600 ሚሊዮን ሊትር ነዳጅ ለመረከብ ተደርጎ የነበረው ስምምነት በዋጋ አለመግባባት ምክንያት መፍረሱ ታውቋል።

እ.ኤ.አ. በኦክቶበር 2025 የተጀመረው ይህ የሙከራ ስምምነት፣ እያንዳንዱ አከፋፋይ በወር 30 ሚሊዮን ሊትር ነዳጅ ከማጣሪያው በመረከብ ለገበያ እንዲያቀርብ የሚያስችል ነበር።

ይሁን እንጂ ማጣሪያው በዓለም አቀፍ ደረጃ እየቀነሰ የመጣውን የነዳጅ ዋጋ ግምት ውስጥ በማስገባት የሽያጭ ዋጋውን ለማስተካከል ፈቃደኛ ባለመሆኑ ውሉ ለአንድ ወር ብቻ ቆይቶ ሊቋረጥ ችሏል።

ይህንን በሁለቱ ወገኖች መካከል የተፈጠረውን አለመግባባት ተከትሎ፣ በናይጄሪያ የነዳጅ ምርትን ከውጭ የመግባት (import) መጠን በከፍተኛ ሁኔታ መጨመሩን የኢንዱስትሪ መረጃዎች ያመለክታሉ።

የናይጄሪያ የነዳጅ ተቆጣጣሪ ባለሥልጣን ባወጣው መረጃ መሠረት፣ በኖቬምበር 2025 ብቻ 1.56 ቢሊዮን ሊትር ነዳጅ ወደ አገር ውስጥ የገባ ሲሆን፣ ይህም ካለፉት ወራት ጋር ሲነጻጸር ከፍተኛ ጭማሪ የታየበት ነው።

አከፋፋዮቹ ከዳንጎቴ ማጣሪያ የሚቀርብላቸው የነዳጅ ዋጋ ከውጭ ከሚገባው ምርት ጋር ሲነጻጸር ውድ መሆኑ ለስምምነቱ መፍረስና ለውጭ ምርት መጨመር ዋነኛው ምክንያት ሆኗል።

ይህ የውል መቋረጥ በአገሪቱ የነዳጅ አቅርቦትን ለማረጋጋትና የችርቻሮ ዋጋን ለመቀነስ ተይዞ የነበረውን ዕቅድ አደጋ ላይ ጥሎታል። ቀደም ሲል የነበረው ስምምነት መካከለኛ ነጋዴዎችን በማስቀረት ዋጋን ለማርከስ ያለመ ቢሆንም፣ አሁን ግን ነጋዴዎች ምርታቸውን ወደ ውጭ ገበያ እንዲያዞሩ አስገድዷቸዋል።

ይህም በናይጄሪያ የነዳጅ ገበያ ላይ አዲስ አለመረጋጋት የፈጠረ ሲሆን፣ ማጣሪያውና አከፋፋዮቹ በዋጋው ላይ አዲስ መግባባት ላይ ካልደረሱ በስተቀር ወደ አገር ውስጥ የሚገባው ነዳጅ እየጨመረ እንደሚሄድ ይጠበቃል።@SECO

Related

በኤሌክትሪክ የምትንቀሳቀስ የዓለማችን ግዙፏ የዕቃ ጫኝ መርከብ

ንብረትነቷ የቻይና የሆነችውና 10 ሺህ ቶን ጭነት የመሸከም አቅም...

ሰሊጥ 21 ሺህ ብር በመሸጥ ከፍተኛ ዋጋ አስመዘገበ

ዋጋው ከቀደመው አመት 20 በመቶ ጭማሪ ሊያሳይ ችሏል ባለፉት ጥቂት...

የዓለም እድገት ወደ 2.6 በመቶ ዝቅ እንደሚል ተተነበየ

በጄኔቫ ይፋ የሆነው የተባበሩት መንግሥታት የንግድና ልማት ድርጅት (አንክታድ)...

በኒውዚላንድ በታክስ ማጭበርበር የተከሰሰችው አዛውንት በኢትዮጵያ ደካማ ኢንተርኔት ማሳበቧ ተገለፀ

ከኒውዚላንድ እየመጡ የሚገኙ ዘገባዎች እንዳመላከቱት  ከሆነ ሄለን ፉአታሃ የተባለች...

የኢራን ጦርነት የኢኮኖሚ ውድቀትን እያባባሰ ነው

ነዳጅ እና ውሀ ማጣሪያዎች እየተደበደቡ ነው። የኢራን እና እስራኤል፣ አሜሪካ...

Popular Categories