ኢትዮ ቴሌኮም የኔትወርክ ማስፋፊያን በማከናወን እና በማዘመን የኢትዮጵያን ዲጂታል መሰረተ ልማት ወደ ላቀ ደረጃ ለማሸጋገር የሚያስችል ስምምነት ከኤሪክሰን ኩባንያ ጋር በባርሴሎናው የዓለም አቀፍ የሞባይል ኮንግረስ ላይ መፈራረሙን ካምፓኒው አስታውቋል።
ፕሮጀክቱ ከኩባንያው የሦስት ዓመት የ”ቀጣዩ አድማስ፡ ዲጂታልና ከዚያም ባሻገር 2028″ ስትራቴጂ ጋር የተጣጣመ እንደሆነና በኤሪክሰን የኔትወርክ አስተዳደር ቀጠና ውስጥ በሚገኙ 1 ሺህ 500 የሞባይል ጣቢያዎች ላይ የማስፋፊያ፣ የማሻሻያ፣ የ4ጂ ንጣፍ እና አዳዲስ ቴክኖሎጂዎችን የመገንባት ስራዎችን እንደሚያካትት ተጠቁሟል።
ይህ ሁለንተናዊ የማዘመን ኢኒሼቲቭ የኔትወርክ ሽፋንን፣ ጥራትንና አቅምን በከፍተኛ ሁኔታ የሚያሻሽል እንደሆነ ካምፓኒው አስታውቋል።

በዚህም ኩባንያው ነባር መሰረተ ልማቶችን በዘመናዊ ቴክኖሎጂ በመተካት የ4ጂ ሽፋንን እና አቅምን በከፍተኛ ደረጃ እንደሚያሳድግና የ5ጂ ተደራሽነትንም በማስፋት ለዘመናዊ የዲጂታል ኢኮኖሚ ግንባታ የሚያስፈልገውን ከፍተኛ የፍጥነት ኮኔክቲቪቲ ዕውን ለማድረግ ያስችላል ተብሏል።
ስምምነቱ ከከተሞች ባሻገር ለዲጂታል አካታችነት ልዩ ትኩረት ምጠቱ የተነገረ ሲሆን በተለይም ፕሮጀክቱ 75 ለሚሆኑ የገጠር አካባቢዎች ተስማሚ የሆኑ የሞባይል ቴክኖሎጂ ሶሉሽኖችን ለማቅረብ ያስችላል፡፡ ይህም የኔትዎርክ ሽፋንን እና የአጠቃቀም ክፍተቶችን ለማጥበብ የላቀ ሚና እንደሚጫወት ተነግሯል፡፡
ከዚህ በተጨማሪም 502 ነባር የ3ጂ ጣቢያዎችን ለማዘመን እና ወደ ላቀ የ4ጂ ቴክኖሎጂዎች ለማሳደግ ከፍተኛ ሚና እንደሚኖረው ተገልጿል፡፡
ፕሮጀክቱ በኤሪክሰን የኦፕሬሽን ቀጠና ውስጥ፣ 2.8 ሚሊዮን አዲስ የ4ጂ ኔትዎርክ የመሸከም አቅም ለመጨመር የሚያስችልና አጠቃላይ የኔትዎርክ አቅሙን ወደ 4.1 ሚሊዮን ያደርሳል።

የኤልቲኢ አገልግሎትን ወደ 157 ተጨማሪ ከተሞች በማስፋፋት፣ አጠቃላይ የኤልቲኢ አገልግሎት ተጠቃሚ ከተሞችን ቁጥር ወደ 276 ከፍ ያደርጋል።
ይህም የህዝብ ሽፋንን በ45 በመቶ በማሳደግ፣ በሪጂኒ ያለውን አጠቃላይ የህዝብ ሽፋን 85 በመቶ ለማድረስ ያስችላል።
ስምምነቱ እንደ ቴሌብር፣ ዘመን ገበያ እና ዘኔክሰስ ለመሳሰሉ አገራዊ ፕላትፎርሞች ድጋፍ በመስጠት፣ በሀገራችን እያደገ ለመጣው የዲጂታል ሥነ-ምህዳር ጠንካራ መሠረት ሆኖ የሚያገለግል ይሆናል ተብሏል፡፡@SECO


