የዓለም አቀፍ የፋይናንስ ተቋም (IIF) እንዳስታወቀው፤ እ.ኤ.አ. እስከ መጋቢት 2026 መጨረሻ ድረስ ያለው የዓለም አቀፍ የዕዳ መጠን ወደ 353 ትሪሊዮን ዶላር በመጠጋት አዲስ ክብረ ወሰን አስመዝግቧል።
ይህ በ2026 የመጀመሪያዎቹ ሦስት ወራት ውስጥ ብቻ የታየው የ4.4 ትሪሊዮን ዶላር ጭማሪ፣ ከ2025 አጋማሽ ወዲህ የታየው ፈጣን ዕድገት ሲሆን፣ ለዚህም ዋነኛው መንስኤ በአሜሪካ እና በቻይና መንግሥታት የታየው ከፍተኛ የብድር ፍላጎት መሆኑ ተገልጿል።
በተለይም የአሜሪካ መንግሥት ብድር እየጨመረ መሄዱ ባለሀብቶች ያላቸውን ዝንባሌ እንዲቀይሩ እያደረገ ሲሆን፣ በአሁኑ ወቅት ኢንቨስተሮች ከአሜሪካ የቴክስ ሰነዶች ይልቅ ወደ ጃፓን እና አውሮፓ የመንግሥት ቦንዶች ፊታቸውን እያዞሩ መሆኑ ተመልክቷል።
ከዓለም ሁለቱ ግዙፍ ኢኮኖሚዎች ባሻገር፣ ከቻይና ውጭ ያሉ የታዳጊ ሀገራት ዕዳም ወደ 36.8 ትሪሊዮን ዶላር በማደግ ከፍተኛ ደረጃ ላይ ደርሷል።
ምንም እንኳን አጠቃላይ የዕዳ መጠኑ ቢጨምርም፣ የዓለም ዕዳ ከጠቅላላ የአገር ውስጥ ምርት ጋር ያለው ጥምርታ (Debt-to-GDP ratio) በ305 በመቶ አካባቢ መረጋጋቱን ቀጥሏል።
ይሁን እንጂ ለመከላከያ እና ለኢነርጂ ደህንነት የሚወጣ ወጪ መጨመር፣ እንዲሁም ለአርቲፊሻል ኢንተለጀንስ (AI) የሚደረጉ ኢንቨስትመንቶች በመካከለኛ እና በረጅም ጊዜ ውስጥ የዓለምን የዕዳ ጫና ይበልጥ ሊያባብሱት እንደሚችሉ IIF አስጠንቅቋል።
በተለይም በመካከለኛው ምስራቅ ያለው ወቅታዊ ግጭት እነዚህን መዋቅራዊ ጫናዎች ይበልጥ እንደሚያፋጥናቸው ተቋሙ ባወጣው ሪፖርት አመልክቷል።@SECO


