ኢትዮጵያ የአፍሪካ፣ የካሪቢያን እና የፓሲፊክ ሀገራት ድርጅት (OACPS) የሊቀመንበርነት ቦታን በይፋ ተረከበች። በብራሰልስ በተካሄደው የድርጅቱ የሚኒስትሮች ምክር ቤት ስብሰባ፣ ኢትዮጵያ ለቀጣዩ የሥራ ዘመን አመራሩን መረከቧን ይፋ አድርጋለች።
የኢትዮጵያ የገንዘብ ሚኒስቴር ሚኒስትር ዴኤታ እና የኦኤሲፒኤስ የሚኒስትሮች ምክር ቤት ተመራጭ ፕሬዚዳንት ወይዘሮ ሰመሪታ ሰዋሰው እንደገለጹት፣ ኢትዮጵያ የድርጅቱን አባል ሀገራት የሚያስተሳስርና በዓለም አቀፍ መድረኮች የጋራ ድምፅ እንዲኖራቸው የሚያስችል ጠንካራ መድረክ ለመገንባት ትሰራለች።
ኢትዮጵያ በሊቀመንበርነት ዘመኗ የልማት ፋይናንስ ማሰባሰብን፣ ደቡብ-ደቡብ ትብብርን፣ ንግድና ኢንቨስትመንትን፣ የአየር ንብረት ለውጥን መከላከል፣ ዲጂታል ሽግግርን እና የምግብና የኃይል ዋስትናን ዋና ዋና የትኩረት አቅጣጫዎች አድርጋለች።
በተለይም የዓለም አቀፍ የፋይናንስ ሥርዓቱን በማሻሻል፣ ታዳጊ ሀገራት የልማት ፋይናንስን በእኩልነት እንዲያገኙ የማድረግ ጥረቶች በግንባር ቀደምትነት እንደሚከናወኑ ተገልጿል።
ይህ የሊቀመንበርነት ዘመን የኦኤሲፒኤስ እና የአውሮፓ ህብረት ያላቸውን ስትራቴጂካዊ አጋርነት በማደስ፣ በዘላቂ ልማት እና በኢኮኖሚ ትብብር ዘርፎች ተጨባጭ ለውጥ ለማምጣት ትልቅ ዕድል እንደሚፈጥር ይጠበቃል።
የአፍሪካ፣ የካሪቢያን እና የፓሲፊክ ሀገራት ድርጅት 79 አባል ሀገራትን ያቀፈ ዓለም አቀፍ ድርጅት ሲሆን ቀደም ሲል “የኤሲፒ ቡድን” በመባል ይታወቅ ነበር። እኤአ በ1975 የተመሰረተው ድርጅቱ ፣ ዘላቂ ልማትን፣ ድህነትን መቀነስ እና እንከን የለሽ ዓለም አቀፍ ኢኮኖሚያዊ ውህደትን ለማሳደግ ዓላማ አድርጎ በመንቀሳቀስ ላይ ይገኛል።seco


